أرشيف التصنيف: عن خبطة

خبطة؟

لو بنرجع لأصل “خبط” بنلقاه هنا  المعجم ،  للأسف و لاواحد من المعاني السابقة له دخل بمحتوى المدونة ؛)

بعُرف البنات نقول احياناً هـالكلجة : “خبطة”

فلانة انخبطت،، فلان خبط فلانة ،، و أخيراً انخبطوا ……. الخ

و ترى المعنى ما هوب شين أبداً ! صحيح فيه خبطات تسبب جروح أو “صعارير” لكن فيه خبطات ترجع الذاكرة و تخلي حياتك سعيدة ( وش أفلام هوليوود؟ )

البداية:

بدأت فكرة المدونة برأسي من كثر المواقف اللي تمر علي شخصياً أو لصديقة أو قريبة بخصوص موضوع الخطب و الزواجات. بداية من أول خطوة  و انتهاء بالعبارة الشهيرة :

*و عاشوا في سبات و نبات و خلفوا صبيان و بنات*

و بما إن المنتديات في الفترة الحالية نايمه إذا مو ميته، فكرت أسوي لي بلوق. فبدل ما أكون صديقة نفسي، قلت أشارككم فيها من باب المشاركة لا أكثر و لا أقل 🙂

طبعاً الفكرة براسي من سنة إذا مو أكثر لكن العجز و ظروف الحياة  أخّروني، و ما أنكر إن أختي العزيزة كان لها دور في تشجيعي بإني أبدأ اكتب هالقصص. و كل ما جاء طاري سألتني وش صار على المدونة.. عموماً شكراً يا “قلق”

النهاية:

ما أنكر إني أحلم و لوهلة بإن أتمنى تكون البلوق بداية لكتاب ينباع في المكتبات ! خاصة بإن  بنات الرياض و عايزة أتجوز مو أحسن مني :$

لكن بكون واقعية، و اكتفي بالفضفضة/الحلطمة/السوالف هنا على أمل تلقون فيها شي مميز و من القلب للقلب. و صدقوني عزيزاتي و أعزائي القراء : سقف توقعاتي يطلع و ينزل بتفاعلكم معاي.

ما أبي أطول أكثر مما طولت، قريب بتعرفون أكثر عن خبطة و عن قصص خبطة.

لتواصل أسهل:

ضيفوا حسابي على تويتر Khab6ah@ حتى توصلكم البوستات أول أول

اشتركوا في المدونة بالضغط على زر Follow ، و ياحظّنا فيكم 🙂